بسم الله الرحمن الرحيم

دقت ساعة الزحف ... دقت ساعة الترحيل

ايون ... ساعات قليلة وهبدأ الرحلة فى الحياة العسكرية

مش متخيل ازاى الفترة هتعدى بس اكيد هتعدى ان شاء الله :)

معاد الترحيل بكرة التلات الساعة 9 صباحاً

وسننطلق بعدها إلى كلية الضباط الاحتياط ف فايد

عرفت ان فايد مدينة جميلة وده شئ كويس

هفتقد ناس كتير الفترة الجاية بس هعيش على أمل انى هرجع ان شاء الله واشوفهم تانى

موضوع الفراق ده بقى شئ مش محتمل مكنتش متخيله

البداية كانت يوم مناقشة مشروع التخرج لما حسيت ان فى ناس خلاص مش هشوفها تانى

دى اخر مرة هنشوف بعض خلاص وياعالم هنتقابل تانى ولا لأ

مشكلتنا اننا بنتعلق بالناس ! وده بيسبب مشاكل مش بنعرفها غير ف وقت زى ده

كفاية كآبة لغاية كده :))

البوست زى عنوانه بالظبط اخر بوست قبل الترحيل

ممكن مش ألحق ارد على اللى هيردو عليه

بس أهم حاجة كل اللى يعدى من هنا يدعيلى لأنى اكيد محتاج دعواتكم جداً

المفترض انى هرجع بعد فترة مش اقل من 3० يوم ل 60 يوم

مش هطول عليكو علشان بحضر نفسى بقى والشنطة والحاجات دى

مجموعة رسايل هبعتها ...

دفعتى اللى اتخرجت وف الاى تى اى

زاكرو كويس وشدو حيلكو المشوار طويل بس النجاح قريب إن شاء الله

دفعتى برضو بس اللى لسه مش اشتغلو

احضرو كل حاجة ف مجالنا كل حاجة وزاكرو وروحو الجو فيرز وربنا يوفقكو

الفرقة الرابعة حالياً

ركزو ف مزاكرتكو ومشروعكو واحضرو الايفنتس التقنية اللى بتحصل ف مصر عموما
علشان مش تكونو منزعلين عن العالم

الفرق الأصغر

لازم تحضرو من دلوقتى الايفنتس التقنية علشان تبقو خريجين متميزين

اف سى اى دريم تيم الجديد

الناس اللى ملحقتش اجتمع بيهم ... ربنا يعينكو وان شاء الله تعملو حاجة كويسة :)

اشوفكم على خير ... فى رعاية الله

(f) (f) (f)

السلام عليكم ورحمة الله وبركاته

ازيكم ... يارب تكونو بخير وتكون قضيتو أيام العيد كويس

النهارده قررت انى ارجع اكتب مرة تانية على المدونة

بقالى كتير مكتبتش مع ان الكتابة هى الحجاة الوحيدة اللى بتطلع اللى جوايا

مع انى برضو وصلت ف وقت من الاوقات انها مش بتطلع اللى جوايا

بس دى محاولة بقى وربنا ييسر

حالياً مش بكتب لهدف معين ولكن عاوز اطلع اللى جوايا وخلاص !

انا اتخرجت السنة اللى فاتت من الكلية وف الفترة اللى فاتت تفكيرى اتغير تماماً

وحاليا هدخل الجيش يوم التلات الجاى كضابط احتياط

كل واحد بقوله كده قالى ليه مشفتش واسطة

وكان ردى ديماً نزعم اننا بعد الثورة وانا رافض الموضوع من أساسه ازاى هقبل موضوع الوسايط والكوسة والحركات دى

وعموما ادينى لبست وانا متأكد ان ده خير ليا

لانى عملت لا أرغب فى ترشحى لضابط احتياط مرتين وبالرغم من ان فى اصحابى كانو يرغبو جداً

بس ربنا مش وفقهم ليها

المهم دلوقتى قدامى حوالى سنتين و ३ شهور مش عارف هيعدو ازاى

بس اكيد هيعدو ان شاء الله

اللى انا عارفه ان عندى أمل ان فى يوم من الأيام هكتب انى خلصت خدمتى العسكرية

يارب اشوف اليوم ده يارب :d

ممممممممم مش عندى حاجة دلوقتى اقولها بس اكيد هكتب حاجة قبل السفر للجيش ان شاء الله

عاوز اعرف بس فى حد لسه بيغلط ويعدى من هنا :)

يالا اسيبكم ناو ... فى رعاية الله :)